開心果

古靈精怪
表情多多
婷婷
你是媽媽的開心果
就算媽媽有多委屈、有多不快
一想起妳
心情便立即好起來!

Josie's wedding

撇低囡囡
和老公到尖沙咀見證Josie的婚禮
看見很多公司同事+舊同事
大家都很久沒見了
產假未完
還有個多星期才上班
呵呵!!
每次看到人家結婚
聽到心裡的肺腑真言
都眼濕濕好感動
如果沒有記錯
Josie跟我是同一期進入公司的
我們一同上orientation
這樣便過了五年
五月四日產假完結重拾上班的日子
剛好是我在這公司踏入第六個年頭
噢!
唔經唔覺原來畢左業咁多年??

兩個月

眨眼又兩個月了
婷婷
媽媽突然發覺妳的頭髮睫毛長 了又濃密了
臉蛋開始由紅黑變成紅白
手仔腳仔裡面的老鼠仔開始跑出來
身長體重頭圍雖然通通落在平均線下
但比例正常
細粒就細粒
沒關係吧!
媽媽從小到大都是班上最瘦小的那個
又如何?
只要妳健康快樂爸爸媽媽便於願足矣!

寶麗萊

忽然覺得這個從網上抓來的

Polaroid Software

好好玩!!!
http://www.poladroid.net/

第一件玩具

婷婷
媽媽真慚愧
居然沒想過送妳甚麼玩具
前日幾位媽媽的好友送妳julia一個
是妳人生第 一件玩具
看來妳還未懂如何跟她好好相處
媽媽祝你跟julia相親相愛!

探外婆

婷婷
第一次帶妳回家探外婆
奶樽奶粉尿片濕紙巾衣服毛巾包被....行李真不少=_=!
幸好爸爸有車
連人帶行李話咁快就到
相信以後這是我們家唯一的假日節目!!

出世紙

親愛的
爸爸媽媽經過一個月的費剎思量
今天替妳取了人生第一張證書
婷婷
妳終於有名有姓了
無論日後喜歡不喜歡
都要記住這是爸媽給予妳的第一份禮物!

洗白白

沖涼前哭哭哭
沖涼時食拳頭
沖完涼又哭哭哭
媽媽祝你香噴噴白雪雪!

像誰?

鼻扁扁似媽媽
口大大似爸爸
到底像誰?
橫看豎看都像個男孩
親愛的
媽媽祝妳越大越像個可人兒!

滿月

親愛的
貶眼間妳又滿月了
媽媽經過一個月的奮戰
換來手痛肩頸酸軟睡眠不足
不過看到妳一日大 過一日
再辛苦都值得
媽媽祝妳快高長大!

感染指數

2009-3-18 蘋果日報

一 滴 血 化 驗 　 快 測 早 產 嬰 感 染
4 小 時 有 結 果 　 助 盡 快 提 供 合 適 治 療

【 本 報 訊 】 早 產 嬰 兒 體 質 弱 ， 即 使 普 通 的 感 染 也 可 引 發 奪 命 敗 血 症 ， 及 早 給 予 合 適 治 療 增 加 嬰 兒 的 生 存 機 會 。 中 文 大 學 醫 學 院 近 年 積 極 研 發 有 效 的 感 染 診 斷 標 記 ， 只 需 利 用 早 產 嬰 一 小 滴 血 進 行 化 驗 ， 可 於 短 短 四 小 時 得 悉 感 染 結 果 ， 有 助 醫 療 人 員 盡 快 決 定 合 適 的 治 療 方 案 ， 並 監 測 感 染 嚴 重 性 ， 準 確 度 高 逾 九 成 。 　 記 者 ： 梁 瑞 琼

中 大 醫 學 院 兒 科 學 系 系 主 任 伍 百 祥 指 ， 新 生 兒 的 發 育 未 完 全 ， 出 現 細 菌 感 染 及 中 毒 性 休 克 的 風 險 較 高 ， 尤 其 是 極 低 體 重 的 早 產 嬰 感 染 後 死 亡 率 高 達 10% ， 有 壞 死 性 小 腸 炎 的 早 產 嬰 ， 死 亡 率 更 較 其 他 早 產 嬰 高 出 三 倍 ， 部 份 受 感 染 嬰 兒 日 後 或 會 出 現 氣 管 、 腦 部 及 腸 臟 問 題 。

於 37 周 出 生 的 早 產 嬰 約 佔 全 港 出 生 率 5% ， 當 中 約 一 成 屬 極 低 體 重 兒 （ 體 重 少 於 1.5 千 克 ） ， 威 爾 斯 親 王 醫 院 每 年 約 有 70 至 80 名 極 低 體 重 嬰 兒 出 生 ， 佔 該 院 出 生 率 1.5% 。 伍 百 祥 指 ， 一 旦 懷 疑 早 產 嬰 受 感 染 ， 會 立 即 進 行 化 驗 ， 一 般 需 48 至 72 小 時 才 會 有 結 果 ， 故 通 常 會 先 處 方 抗 生 素 ， 因 早 產 嬰 一 旦 感 染 可 於 一 兩 日 死 亡 ， 待 化 驗 證 實 無 感 染 才 停 藥 。
伍 百 祥 表 示 ， 當 身 體 受 細 菌 或 真 菌 感 染 ， 肝 臟 便 會 產 生 大 量 「 C 反 應 蛋 白 」 ， 透 過 測 定 此 蛋 白 的 水 平 雖 然 可 以 確 定 早 產 嬰 有 否 受 感 染 ， 但 蛋 白 水 平 在 感 染 後 六 至 八 小 時 後 才 顯 著 上 升 ， 難 以 做 快 速 測 試 。 此 外 ， 外 科 手 術 、 組 織 損 傷 等 也 可 引 致 蛋 白 水 平 上 升 ， 造 成 假 陽 性 。
中 大 近 年 研 究 以 細 胞 表 面 抗 原 CD64 作 為 感 染 標 記 ， 並 為 338 名 疑 似 早 發 感 染 的 早 產 嬰 進 行 檢 驗 ， 當 中 115 人 確 定 感 染 ， CD64 水 平 更 於 感 染 短 時 間 內 急 升 ， 測 試 的 敏 感 性 及 特 異 性 分 別 高 達 96% 及 81% 。
伍 百 祥 表 示 CD64 是 中 性 白 細 胞 、 淋 巴 細 胞 等 炎 症 細 胞 的 表 面 抗 原 ， 一 旦 遇 到 細 菌 或 病 毒 ， 數 量 會 在 數 分 鐘 內 急 升 數 倍 ， 只 需 一 滴 血 便 可 進 行 檢 測 ， 並 可 在 四 小 時 內 有 結 果 ， 有 助 及 早 停 用 抗 生 素 ， 或 協 助 一 些 在 常 規 化 驗 中 無 法 找 到 源 頭 的 早 產 嬰 確 診 。
不 過 ， 現 時 CD64 的 檢 驗 全 由 人 手 操 作 ， 暫 未 能 大 規 模 臨 床 應 用 ， 伍 百 祥 表 示 威 院 現 時 只 會 為 病 情 較 複 雜 的 嬰 兒 進 行 此 測 試 ， 期 望 未 來 能 發 展 全 自 動 化 檢 測 程 序 ， 令 更 多 早 產 嬰 受 惠 。
------------------------------------------------------------------------------------------------
當 日醫生只交代一聲bb的感染指數偏高
便突然從我身邊把bb送走到加護病房
到底什麼是感染指數?是什麼為基準?
說 來說去都只告訴我是「感染」的「指數」
感染了什麼?....「未知」
從腳仔打入一支又一支抗生素
害我白白擔心 了幾日
還一個人在醫院偷偷的哭了出來
幸好三日後報告出來
無事走得
咁....到底咩係感染指數?
依 然係一個謎!!!!
直到今天看到以上一則
明白了!

終生學習

親愛的
想不到當媽媽比想像中艱辛得多
一日廿四小時無不膽戰心驚
昨晚你吃了三安媽媽奶
正當媽媽滿意地稱讚你的時候
突然你把所吃的從鼻孔咀巴一滴不漏通通噴出來
嚇傻了爸爸媽媽
唉!
到底你想點樣?
媽媽祝你快點懂說話!

斷臍帶

親愛的
3月8日本是你的預產期
可是你早了兩星期到來
今天是你的第十四天
哇哇哇哇哭了一個 早上不肯睡
無意中才發現臍帶居然消失了
好不容易在腰間的衣服裡找出來
難怪你哭了一個早上
是媽媽疏忽啊!
脫離與媽媽十個月的連繫
從此成為真正的獨立個體
媽媽祝你大個女了!

兩安半

十二朝的人仔
過著每餐兩安半的日子
每三小時自動覓食
we we wa wa 兩滴眼淚頭擰擰咬拳頭
親愛的
媽媽祝你食得是福!

剪指甲

親愛的
媽媽第一次替你剪指甲
人仔細細手指長長
將來無論遇上任何挫折失敗
記得拖實爸爸媽媽 的手啊
祝我們手牽手一起成長!

帶你來到這世界

親愛的
你終於來到這世界
今天是你的第十一天
媽媽每次看著你都覺得很愧疚
由於你早了兩星期到來
身體又較其他小朋友細小
加上在媽媽發燒的情況下出世
所以在第三日時被送進加護病房檢驗幾十萬份報告
每 次看到你小小的手腳被拮滿瘀血
還有打點滴的針口
心裡都覺得很難受
幸好一切都過去了
爸爸 媽媽向你保證
在往後的日子
我們都會無條件的保護你愛錫你
你也要爭氣啊!
媽媽祝你健康快!

bb出世了(38w1d)

這兩天半夜腰骨赤赤痛，有點像m痛的感覺
而且昨天開始發覺有些奇怪的分泌物
直覺覺得bb是時候出來了
果然今天一早吃過早餐後見紅
便立即沖涼洗頭call老公準備入院
當時大約半個小時一次陣痛
所謂的陣痛其實不外如是
根本一d都唔痛，只是陰下陰下
趁著未入院，又喝了碗白蓮蘇涼茶
希望阿b擊退色斑，白白滑滑咁出世
等了兩個鐘依然是半個小時痛一次
本來我想等到15mins痛一次才入院
但在心急的媽媽三催四請下
終 於和妹妹三人一同乘的士去醫院
到達產房醫生檢查
竟然說我發緊燒(37.x度)加上bb心跳太高
恐怕bb會受到感染
立即決定給我催生
醫生先檢查宮頸是否成熟、然後替我破水、吊鹽水及落催生藥
預 計bb今晚或最遲明天早上便出世
一切都來得太突然了
媽媽立即通知老公從深圳回來
我一個人在產房內看著冷 冰冰的儀器
看著bb心跳、宮縮頻率、自己的血壓、體溫.....
心裡只想著希望早點看到bb
雖然屏幕顯 示宮縮不斷出現
但我竟然絲毫不覺得痛
後來醫生幫我加重藥
期間不斷有醫生、護士、學生出出入入
還 有其他產婦淒厲的叫聲
等了4個鐘突然很痛
醫生檢查竟然開到8度.....頂~!
點解我一直都唔覺得好痛 既?????
我開始聞笑氣、姑娘叫老公入來準備陪產
我條腰痛到好似斷開了
姑娘叫我一直忍住唔好痾等醫生 黎(這時是最痛最辛苦的)
後來終於忍唔住，我feel到有舊野係我門口了
老公替我按鐘
姑娘來檢查，大叫 一聲快啦
然後有隊為數四、五人的接生隊衝入來
這時我又突然靜止了數分鐘
大家望住我呆站著.....
突然又痛到死的時候手拉腳撐吸氣用力痾阿b出來
痾痾下的時候feel有姑娘剪我....頂，我又窒左一窒....
姑娘大 叫:「唔好理我地做乜，你繼續痾....」
「唔好叫...留番d氣生出來」、「見到了、見到了、已經好低架啦....」
「頭 仔出來啦， 差少少....」.......
痾了5、6次便感覺到有野被拉出來
b女終於出世了
細細粒， 眼仔碌碌聲大大，2.47kg
老公驚到唔敢剪臍帶唔敢影相
生完阿b即刻好精神
好興奮啊!!!
由 入院到生都只係用左6個鐘
真係痛都只係痛左半個鐘
ok啦!!
我要做人媽媽啦!

Canon IXUS 870 IS

舊相機壞了半年
一直閒置在櫃底內
沒有心情去修理或更換
所以很久沒有拍照了
為了迎接兩星期後到來的小生命
老公決定購入新的隨身拍
不用常常拿著大機出外
方便記錄我們的寶寶
生命真的好奇妙啊!
從無到有
從水泡般的胎囊到有頭有身有手有腳有器官
再過兩星期便實實在在的擁在懷裡
從兩個獨立個體到共同擁有雙方基因血緣的結晶
這是屬於我們獨一無二的寶寶啊!
老公從前對小孩子沒甚興趣
但自從發現自己當爸爸後
居然會對街上的bb金晴火眼甚至un古古
頂~!
人真係會隨年紀身份來個一百八十度大轉變
好期特未來一家三口的日子啊!

傷風還未好(36w3d)

傷風感冒已接近兩星期了
還未完全康復
吃了一星期藥
這個星期也沒有再吃
單靠檸水生果意志戰鬥到底
希望過幾日好番啦
萬一而家bb出世
我怕鼻塞塞沒有力生呀!
這兩天對腳超級腫
腳指腳面腳眼也脹鼓鼓的
很像薰蹄啊~(看見了又突然好想吃~_~)
之前吃傷風藥的一個星期
手腳身體都沒有痕過
這幾天一停藥手腳又痕番
真係攞我命~!
數數手指
如果bb沒有過期居留
還有大約三個星期便出來了
好想bb快點出來呀
最好就在38-39週
一放產假便卸貨
讓我可以多點時間照顧bb
這幾天間中都有久違了的M痛感覺
是不是宮縮呢?
行路也較以前辛苦得多
坐多了股骨有時會酸痛
當媽媽真不容易啊!
奶奶昨天煲薑醋了
bb
爸爸和媽媽真的好心急好心急又好緊張好緊張呀!!!

傷風了(35w1d)

星期五下午已經開始鼻塞喉嚨痛眼熱
feel到有唔妥
返屋企即刻食粒收鼻水的藥
這是上次皮膚痕醫生開的抗敏感藥
用途廣泛
亦可作傷風收鼻水之用
所以唔怕的
星期日還出現耳鳴
結果待到星期一才有醫生看
最後醫生都是開了這些藥丸給我
還有喉糖及維他命丸
他說bb已經35週
這些藥已經不會影響bb
就算bb現在出世也沒有問題
今次我體重有134磅
跟一星期前差不多
bb就有2380kg, 大約是5.3 lbs
大小剛好
不過還未落盤骨
即係未咁快生得住!!
最近日日都出現無痛宮縮
醫生話臨盤前一個月經常出現是正常的
bb最近活動得很厲害
手腳都頂了出來
肚皮不停震震震
好得意
希望快d好番啦
d藥唔好影響到bb
唉~
我真是一個失敗的媽媽
小心翼翼的過了8個月
現在最後一個月先黎病
bb
你要同媽媽一齊加油啊!!

見營養師(34w5d)

一早約了9:45am見營養師
交低$60
等了又等 等左個半鐘有多
今次居然話我食得少
怕bb唔夠營養
要食番多d菜、生果
唔好再飲全脂奶, 要飲脫脂
又話我食飯食得少
頂~~
之前多又話多
而家少又話少
好鬼麻煩
好彩之後唔需要再去
唔埋咁多啦
bb就黎出世
我乜都食啦~!

33w4d

不經不覺已來到懷孕的尾聲
還有六星期我的bb便出世
這個月痛死我的身痕+脫皮似乎好轉了
肚皮不再受到折磨
脫皮後痛了幾天似乎也光滑了不少
雖然滿肚黑印
但至少不痛也就舒服得多
其他的待生完再慢慢恢復吧!(希望可以啦)
最近開始面腫、腳腫、下肢有點無力、腰酸、肚皮越拉扯越緊
像我這種婚前零脂肪的人
肚皮像被爆開似的
活像一個西瓜波
昨天回醫院覆診
上次驗血的肝酵素正常(放心了)
醫生說身痕問題許多孕婦都有
另外開始每天紀錄胎動情況
12小時內最少有10次
放心
bb無時無刻都在開party
有時還突左d野出黎(唔知係pat part定係拳頭??)
今次體重有60.5kg
.
.
好心急啊~
下個月開始放產假了
bb你要生生性性、順順利利出來見我們啊!!!

去胎毒(對抗妊娠搔癢症)(32w1d)

身痕問題纏繞我已經三個星期
最近開始減退了
上星期四去醫院覆診有點尷尬
因為肚皮r損的地方開始凋謝
現出一撻撻黑印並開始脫皮
穿上衣服後加上肚皮膨脹
全身都拿拿痛
真係小拿媽~
手腳紅點還未退
像是一個被火燒過的火人一樣
醫生同樣開了eurax藥膏及抗敏感丸給我
而且抽了點血驗肝酵素
希望正常啦~
這幾天經過媽媽的密集式去胎毒法
其實已經好得七七八八了
太好了!!
方法是:
1.沖涼用微暖水，可以的話用凍水，並戒掉所有淋浴露肥皂，只用清水
2.以天然欖油代替潤膚露，停用其他所謂的去紋膏、bb油
3.沖涼後以金銀花菊花煲水.....或以普洱茶煲片糖.......抹身/沖身/浸身，後者非常有效，除滋潤外，還加速紅色的粒粒凋謝
4.最重要...喝大量的暖水，由於孕婦體內血濃度較常人多40%-50%，因此大量的清水是必要的，以加速血液循環
5.進食涼血食物.....這幾天....我喝了白蘿蔔水、菊花茶、西洋菜湯、白菜乾湯、芥菜、西瓜....非常有效....尤其是西瓜....吃 了後非常舒服.....過多幾日，試下食龜靈膏和綠豆沙先!!
6.戒食牛肉，可能前陣子吃牛肉太多以致燥熱發癢
7.原本媽媽說皮膚敏感要戒魚類海產、雞蛋及豆類....不過我怕bb唔夠營養，所以照食.....
8.由於天氣勁乾燥，老公昨天放了兩部加濕機在房間，使室內濕度長期保持在70%-80%.....good~!!!!!
至於醫生開的抗敏感藥我一粒也沒有吃
藥膏也塗了兩次便停了
現在已沒有痕
不過脫皮的地方很痛
像廿萬隻蟻正在咬你肚皮一樣
又赤痛又拿，一看到身上花斑斑便好想哭
晚上側睡時肚皮拉扯又拿到無法入睡
我最希望就是身上的斑、印、紋早點散去
還我白雪雪的身體~!!!!
bb,
你一定要孝順我呀!!!!
媽媽為了你
真的真的好辛苦啊~!
--------------------------------
1月8日的體重有58.5kg
跟上星期好像沒有多大變化
可能是睡不好沒長肉吧!

30w5d

今天一早到中環看醫生
這兩個星期的體重居然沒有增加
依照停留在128lbs
唔通食少左飯會唔重
咁bb咪唔夠食羅?
醫生說我的皮膚痕是妊娠性的
只要忍多兩個月一生完說唔痕架啦
仲開了抗敏感藥及Eurax藥膏給我塗
他說藥膏不含類固醇
不會影響bb
但我都有少少擔心
我個肚而家一舊舊紅印突起了
越出越多又痕又痛
而妊娠紋也被我抓破了
一條條好似被火燒過的爛肉
真係好核突
搞到這幾天心情很差
人生bb我生bb
點解我個肚咁肉酸??
雖然老公不停安慰我
但我自己見到都好驚
第日唔知會唔會退得清呢?
醫生今天說我bb size比較細一點
有1437g, 是30w的大小
噢~~
是否最近食少左所致呢?
都係唔埋啦
食返多d野
bb要肥肥白白咁出黎見我地呀!!!!

周身痕(30w1d)

bb,
最近個多星期
媽媽真的好辛苦啊!
肚皮、大腿小腿、膝蓋、手臂....
基本上全身有肉的地方都痕死了
半夜痕到睡不著
R到天光
點算好?
塗什麼也沒有用
這幾天R到出紅點赤赤痛
看到自己的身體又紅又花又爆妊娠紋
好想哭啊~!
最初以為轉天氣乾燥所致
但媽媽好肯定唔係
bb,
媽媽未有你以前不是這樣的
人家說是胎毒
通常在懷孕後期發出來
bb透過母體發了出來
將來出世以後皮膚會好d
唔會敏感
唉~
還有兩個多月要忍
希望不要R到流血啦
前晚嘗試用薑水沖涼
效果不大
昨晚改用金銀花菊花煲水洗身
再用BB油
果然舒服多了
紅印也退了
可是後來媽媽又手多塗了凡士林
結果痴立立又痕過
半夜又痕醒了
好~~
今晚繼續用金銀花菊花洗身
唔塗其他野
應該OK的!!
bb,
你要同媽媽一齊加油啊~!
.
.
.
今天是我的生日
沒有街去、沒有活動、要戒甜不可吃蛋糕
都沒所謂
今年的生日願望只有一個
就是bb你要平平安安來到這個世上!

bb床(30w)

bb,
今天爸爸媽媽終於為你訂了bb床
昨天走遍千色店+荷花都選擇不到
最後還是今天去吉之島買了minimoto bb床連四吋床褥
又選定了bb車
太好了
一切都準備就緒~

消毒奶煲(29W5D)

bb,
今天是boxing day
媽媽和你婆婆姨姨去了吉之島為你選購了奶煲
之前媽媽已做過價格及實用程度調查
本來打算買Tommee Tippee奶煲
不過最後在婆婆的唆使下
最終選擇了最貴的Avent
一分錢一分貨
幾個月前見到要七百幾
今天才$690，八折後只需$552
還附送一大一小奶樽、四個奶咀、兩個安撫奶咀、洗瓶刷
真係好抵啊~!!!
另外媽媽又買了紗巾及bb帽仔給你!

剪髮+執走佬袋(29w4d)

早上去了剪髮
一來為了bb吸收多d營養
二來為了方便坐月
在毫無心理準備之下是但入了一間髮型屋剪頭髮
又是但的剪了一個小丸子頭
唉~算啦
雖然好柒
但我諗無人會怪呢個大肚婆的...
我見過好多大肚婆都剪過呢個指定髮型
返屋企仲俾媽咪同阿妹笑...
大妹:我幫你剪都得啦
細妹:你係咪自己剪架.....個髮型師都幾無style架喎~
媽咪:以前都好多人剪呢個頭....幾復古丫...
頂~!!!柒就柒啦....駛唔駛轉彎抹角....
大肚大晒架....我唔理人地點睇....
為左bb好...柒就柒!!!!
.
.
今天執了走佬袋....好大袋....
執完好似放心d
就算萬一bb早了來臨都不致於出亂子...!!!
.
.
.
最近皮膚好痕...晚上手腳痕到訓唔到....
R...R...R....就黎俾我R到損晒....
個肚又變了西瓜皮...又痕....
點解會咁架....
到底是糖尿...定胎毒...定乾燥????
好煩呀.....!!!!

1800kal營養餐(29w3d)

平安夜一點也不平安
今天要請假8:00am前入院食營養餐
並要學習用血糖機篤手指
頂~
仲早過平時返工=_=!
先在家吃過早餐(煎蛋+一片方包)
帶了梳打餅及屋仔奶入院作早上小點
因為預計只需留院半天
所以不用換病人服
good~
早上有醫生巡房檢查身體
第一次幫我度肚圍
可能這幾天食少左好多好多飯
今天上磅竟然只有57.8kg
比前幾天輕了???
bb唔會唔夠營養掛~~(擔心!!)
然後過了兩個鐘拮手指
我頂~
好x痛.....>_<
得4.2度
之後又有一個串串地的醫生巡房
串我跟唔到餐單食野
跟住.........過左一個鐘
又有一個好nice好高級的醫生帶住兩個醫生+兩個實習巡房
等....等....等....
十一點幾去照超聲波
嘩~好開心...又可以知道bb情況了
雖然我看不到屏幕
但醫生說bb個頭仔向下
下~~
咁快??
唔知仲會唔會轉番上黎呢?
bb現時重1.25kg
是合適的週數
唔大唔細，中位數
放心晒~!!!
照完去看電視(關於妊娠糖尿的教育電視)
然後姑娘趁午飯前的空檔過來教我們拮手指
頂~
可唔可以食完飯先學
無端端又拮多次>_<
得4.5度
.
.
終於有飯食....
有一大盆飯+一大盆白菜+兩啖茄汁碎雞粒
仲有兩塊梳打餅+迷你橙俾你作下午茶
食晒成盆飯都飽既.....
不過如果第日生完係醫院食呢d野，我真係想死羅~
行行企企又等兩個鐘
其間被兩個實習醫生訪問下
既然係我師弟妹就幫下你啦....
等到3:00am又拮手指啦
今次都係4.8度....passed....媽媽可以接我回家了
太好了~
不用在醫院度過平安夜~
bb
你知道嗎?
爸爸不在香港
媽媽一個人在醫院真的好孤獨啊~
加上又有義工嬸嬸派聖誕禮物同歡樂傳萬家
我更加覺得自己好淒涼
.
.
.
幸好你爸爸放工後即刻趕回來看我們
雖然他很累很累
但都過來陪我們吃飯啊~!
晚上又要拮手指
用左幾次都有error
我頂...gi到我成隻手指頭都係血...又瘀了一點點
終於用到第三張試紙先ok
有5度....
好啦....
我今日都好正常呀~!!!!

見營養師(28w4d)

今天一早10點便到醫院見營養師
先交$100
點知等到11點先有得見
真係好無聊
營養師記錄了我日常的飲食習慣
然後解釋一下每天的飲食指南
要跟足指示每天進食的份量及餐單
我的情況是每天進食1800卡路里
我諗食少d飯戒甜都已經ok掛~~
我怕跟佢餐單食
bb會唔夠營養播??
見完營養師12:00即刻飛的去西九龍健康院覆診
原來血糖高少少
驗尿未必驗得出
如果驗尿驗到已經是很嚴重的情況了
今天體重58.2kg
大概是128lb
姑娘說除體重升得太多外
其他一切正常
不過健康院的記錄是六星期內的體重變化
三星期前我在私家檢查是125lbs
所以這三個星期只重了3lbs
是正常的!
奇怪是為何在11月份突然重得太多~
覆診完和媽咪吃過午飯
又到了葵芳租血糖機
是瑪嘉烈轉介的羅氏血糖機
$300按金直到生完一個月後還
另$180買50套試紙及針孔
一想到要拮到生便怕怕了
攪左成日回到家已累死了
下星期還要入院=_=!
好麻煩啊~

血糖測驗不合格(28W3D)

原本以為沒有收到醫院的電話
前日做的血糖測試應該沒問題
那知今天下午瑪嘉烈醫院便來電
告訴我的測驗不合格
噢~
咩事呢??
點解會咁!!
標準值是7.8度
空腹測試是4.3度
飲糖水後是8.2度
只是高了少少
頂~!!
可能是我前陣子暴飲暴食所致
明天要去見營養師
24/12平安夜要入院食營養餐
還要每天拮手指驗血糖~~
好可憐啊!!

驗血糖(28w1d)

一早空著肚子八點到瑪嘉烈驗血糖
先抽血à 飲糖水à等兩小時à再抽血
姑娘係抽血房內用食雲吞麵個隻size的碗開糖水給我飲
點解好似廚房/pentry個格局咁??
我見佢加糖加水攪兩攪
衛唔衛生架??
等我仲以為係一樽樽好似寶礦力咁密封pack好的
嘩~
第一啖凍冰冰甜到chok喉標眼水
點都係甜
拿拿聲一飲而盡反而無咁辛苦
飲完又ok喎
個口甜甜地幾好味~
反而碗糖水未溶晒仲有d糖黏底
算數~姑娘話ok
又悶又餓又眼訓等足兩個鐘
終於抽完第二次血
即走!!

有同事教我帶個檸檬加落去飲易入口
我本來仲想帶埋飲管加冰扮凍檸水
不過都係唔好啦
費事俾人鬧又要飲多次

唔知幾時有報告呢?
希望無事啦!

走佬袋(27w6d)

早上媽咪陪我到護協買bb用品和走佬袋的東西
趁早去沒太多人可以慢慢睇
不過我們到達時都已經有唔少人了
差不多都買齊
幸好媽咪陪我幫我拎野做我護法
自己一個人真的不敢去太遠
雖然肚紋越來越多人越來越論盡
但一想到bb快出世便很開心
bb,
你要乖乖地足月才出來啊~!

27W4D

很久沒有記下bb的狀況了
其實大致上都和一般孕婦一樣
只是肚皮的妊娠紋越來越多越長越深色
還有
可能經常痕癢抓得多
竟然出暗瘡
花斑斑的好肉酸啊~!
上星期三晚發現腳腫情況
腳眼兩旁腫到似豬蹄
過兩天又消腫了
最近雙腳經常沉甸甸的
明明沒多走路卻好像很累
翻看資料這都是懷孕6-7個月會出現的情況
故也不太擔心
還有3個月
bb
你爸爸和我都開始緊張起來
好想快點看看你啊
過幾天要執拾走佬袋了
基本上除了bb衣物及奶樽
其他用品全部都未買
過了這個星期
待你爸爸考完試我們便要動身為你準備了~!
bb
你婆婆最近常燉燕窩給媽媽吃
果真世上只有媽媽好啊~~ >_< !!!

從新開始

爸爸明天出殯
就這樣
一生人匆匆活了幾十年
從此灰飛煙滅
到底得到了甚麼?
帶走了甚麼?
為了肚裡的孩子
為了媽媽
強作堅強鎮定
沒有爸爸的日子
家裡好像永遠不完整
看著我畢業當天一家齊齊整整拍的合照
爸爸展現難得一見的笑容
我想以後再沒有機會了
爸爸
好想你啊!

25W6D(760g)

今天到中環看醫生
看到b女有760g
大慨1.67磅
看來還是很輕
但我已經達125磅了
醫生說我兩個月長了15磅是很誇張啊
整個孕期到目前為止已重了25磅
最近3個星期更重了7磅
噢．賣．葛!
bb
你要吸收多d先得
唔好肥晒係媽媽度
今天醫生指出你鼻仔同咀仔給爸爸媽媽看
哈~~
都係似媽媽
鼻仔又扁又大
bb
還有3個月便可以抱你了
好心急啊~!
可能媽媽肚皮很薄
最近兩星期狂爆妊娠紋
一條條像被人打瘀了的紅斑
圍住肚皮下方狂標
最嚴重是腰兩旁的位置
好肉酸呀
bb
你知道嗎
媽媽未有你以前是很瘦很瘦的
而家已經冇左條腰啦
不過唔緊要啦
你最重要吸收多d營養
唔好浪費我副身材
暫時都是抽了3次筋
都是早上突然轉身起來時發生的
還好不算嚴重
很快便沒事
還有最近有嗜甜的習慣
以前不愛甜食的媽媽
突然轉了口味
這個月bb你一天比一天活躍
無時無刻都感到你踼我
而且幅度越來越大
曾經出現2-3次無痛宮縮
肚皮都變了三角形
好誇張呢
幸好醫生說一切都是正常反應
希望未來3個月順順利利
你可以平安來到這個世上!

再見了，爸爸!

爸爸在十一月十四日晚走了
永遠也不會回來
身懷六甲的我
作為女兒居然沒法在他彌留間陪伴身旁
自入院廿多天以來
也無法見他一面
爸爸
你會怪我嗎?
人生往往出現許多無可奈何的事
是我們今生沒有這種福緣吧!
媽媽說
當時你緊緊的捉著她的手
說放心不下丟低她一個
你放心吧!
我們四姊弟會一直陪著她
她不會寂寞的
我也會堅強的生活下去
爸爸
你不用掛念我們
一路好走!

22W4D

今朝一早到健康院檢查
體重:53.8kg
很好
bb心跳有一百二十幾
一切正常
六星期後再回來覆診
這陣子肚子好像沒什麼長大
不過bb就經常在肚子裡搞搞震
好好笑
我想bb都像我們一樣
不是肥騰騰的bb
應該是高高瘦瘦頭仔細細的b女啊!

瑪嘉烈照結構(22w3d)

bb,
中午你婆婆陪我到醫院照結構
先到地下交了$60
再上二樓等、等、等....
照了半個小時
妳好害羞啊!
把小手放在臉上遮掩著
無論姑娘怎麼搓怎麼彈都不肯就範
無法看到你的唇顎
結果媽媽要到外邊休息十五分鐘再照
第二次姑娘又搞了你很久
終於照到了
姑娘還讚你的唇顎很完整啊
bb
你好健康呀~
媽媽看到你4個心室、脊骨、手指、手臂、大腿骨、腎、大腦、頭骨、胸腔等等....
雖然你的頭骨和胸腔細了幾天
但沒關係吧!
媽媽都是頭細細、身瘦瘦的女孩
只要你像爸媽一樣健健康康長大就好了!
照完媽媽很累啊~
肚皮被姑娘搓到有點不舒服
剛才看見你抱著自己卷曲著身子像隻蝦米一樣
頭也貼到心臟前
好怕你會屈到
我擔心的問姑娘
是否我的肚子較小
使你沒有活動的空間???
幸好姑娘說很多bb都喜歡抱著自己的
不關肚子大小的事
還有
你婆婆一邊看著妳一邊問了姑娘許多問題
「呀~~~你會唔會整痛佢架?」<---(你 係咪行路黎丫?行路都會震啦，唔會咁容易整到佢架...)
「係仔定女呀?」
「我廿幾年前生個陣有冇得照架?」<----呢句最妙!!
(姑娘說: 有冇都無關係啦，都生左出黎廿幾年，個個大晒啦，有又點冇又點?)
「呢度係邊到黎架?」
「成日照會唔會影響佢架?」
「咁多張相，可唔可以俾一張我帶走?」<----(梗係唔得啦，俾左你我咪冇紀錄羅~)
「你好叻呀?咁都睇到!!」 <---(姑娘沾沾自喜:係呀，訓練左好多年架，係外面求其叫位 姑娘入黎都唔識架!)
「點解睇唔到既??」
哈哈~
個位姑娘都算好耐性了
把問題一一回答
沒有把你婆婆趕到外面去

護協

bb,
今天爸爸和我們到護協買了些用品給你
好抵呀~
我們買了六個bfree奶樽給你
還有奶嘴、奶樽擦、3對手套仔、棉巾....
可是星期六太多人了
有些東西沒法細心看
唯有下次再去
趁著媽媽還可以活動自如步履輕盈
早點替你置東西
萬一你早了出來也不至於出亂子呀!!!
還有
你爺爺為了你買了架四門的車仔給媽媽用
使你將來坐得舒舒服服
你看
他們都很愛你呢~!

胎動(21w3d)

bb
其實過去數星期媽媽都感覺到你在動
可是一直懷疑到底是否腸蠕動
直到這幾天
胎動感覺更加明顯
有時把手放在肚皮上都感覺到手在震
尤其是平躺的時候更容易感覺得到
昨晚和你爸爸通電時
你不停的踢．踢．踢
你是否也很想念爸爸呢?
他今天回來了
很快又可以親親你
前晚你婆婆把手放在媽媽的肚皮上
她也感覺到你這麼活躍
哈哈!

買bb衫(19w6d)

bb,
今天你爸爸和我到吉之島逛逛
替你買了幾件和尚袍及手套仔
實在花多眼亂心大心細
不同牌子產地款式顏色
都不知從何入手
我們都是第一次當爸爸媽媽
甚麼都不懂
光看奶樽用上個多小時都決定唔到
仲有好多好多野要買
你是我們家第一個寶貝
親戚朋友們都沒有出生不久的小孩子
所以沒有任何bb用品可轉贈給你
現時甚麼都未開始準備
好煩惱啊~!
bb請放心
爸爸媽媽都會把最好的東西給你的
只要你聽聽話話快高長大健健康康同埋孝順我 地就得啦!!

好心人

今天遇到一個心腸很好的男人
迫使我不得不為他寫一篇以誌表揚
.
隨著肚子越來越大
一般放工乘地鐵都有好心人讓座
而通常我遇到的都是男人
(難道b女很有異性緣??)
.
有粗聲粗氣的中年男人向我揮手:「姐仔，過黎，俾你坐..」
「唔該」
好惡好大聲:「唔勢~~」
.
有地盆佬以閃速霸位，然後施施然起來對我說:「你坐丫~」
別人可能以為他是我老公
.
有斯斯文文的西裝友無聲無息扮落車離開座位
我坐低後才發現佢原來同我一樣坐十幾個站先到
如夢初醒般想同佢講聲「唔該」都無機會
皆因佢已經背著我站得遠遠了
.
有cool到爆的麻甩佬倚著玻璃板的企位
居然客氣到連我都唔放過
讓個企位我「挨」住
.
有金毛爛仔打扮的年青人揚手叫我過去坐
好驚訝原來飛仔都好有禮貌
後來看到他閱讀手上的筆記
嘩~
C H E M I S T R Y!!!
失．覺．晒!!
.
有好過好人的專業人仕年輕夫婦讓位我坐
「唔勢啦，我好快就到」(只有3個站)
拒絕了一次還不死心
到了下一站
好丈夫:「坐啦，又話就快到，都未到，坐下先啦....」
好啦好啦....好人到我屈服了.....
落車時，好丈夫讓出通道給我
好太太微笑說:「拜拜，小心d呀~」
.
噢．賣．葛!
我仲以為明愛暖萬心定萬眾同心公益金係度拍緊宣傳片
.
今日遇到的一個好男人只有廿零三十歲
我站在門邊差點被推出車外
到達下一站時
居然仲有成班人發晒狂咁迫入黎
我本能反應只係識保護個肚
點知旁邊有位英雄居然大叫
「唔好迫啦，人地有bb架~」
嘩!!
真係感動到想喊，好多謝呢位兄弟啊~!
下車時還為我開路
擋住其他人
突然覺得呢個世界實在太美好了~~
貪心的我本來還想尾隨他一起轉車方便照應!??(是我需要照應吧!!!)
不過最後都因為面皮唔夠厚而作擺!
.
回公司跟同事說起
他們居然一口咬定呢位英雄誤會了我是被人搞大個肚的未成年少女
細細個做單親媽媽已經好慘好可憐
所以挺身而出幫我
頂丫~~
.
人家明明就是好人
好人一定有好報!

流牙血(19w4d)

這陣子出現過兩至三次流牙血的情況
唔係食緊野刷緊牙
係自己無端端流出來
牙肉也有少少酸痛
相信是bb大量吸收了我的鈣所致
後來發覺常用漱口水可改善情況
另外
這幾天常覺口嚨灼熱
胃酸不斷湧上來
好辛苦
曾經在有關書籍中看過
當bb長大至中期
位置會升高
從而頂住胃部
造成這種情況
bb
轉眼間已到了孕期的一半了
時間過得很快很快
還有20w
爸爸媽媽便可以抱抱你了
^_^

---------------------------------------------------------
昨天在媽媽世界買了條孕婦褲
普通過普通的七折後都要三百幾
真係識搶呀~

跌倒了(18w4d)

今天原本要到健康院檢查
可是一早起床梳洗後在厠所門外「冼」了一腳
差點要一字馬時右膝頂住
結果好痛好痛的瘀了一遍
媽媽聽到我大叫立即過來扶起我
眼淚卻不住地猛流
我真的真的好驚啊~
我的寶寶千萬不要有事呀
媽媽爸爸每一個人都好愛你
是我不好又小心了...
哭了很久還未平伏
妹已被我舉動嚇呆了
因為地上的水是她不小心遺下的
如果有咩事, 她便成了「殺人兇手」!!!!
我又憤怒又驚慌的立即去看醫生
幸好今天是健康院的例行檢查
好快可以即刻見醫生
檢查過後一切正常
幸好我跌下時肚子沒有著地或受撞擊
寶寶也安然無恙
太好了
感謝~!!!!
醫生替我檢查時順便抽了一點分泌化驗
寶寶心跳有一百三十多下
跟上個月差不多
肚子大小跟媽媽體重也很正常
非常好!!!
今次有51.4kg
醫生也讚好呢~!!
我以後要小心d了
我要做個負責任的好媽媽
也不要讓你爸爸擔心我們!!!

17w5d

這兩天肚皮很實
躺在床上
肚子實得不會塌下來
很繃緊的感覺
我覺得bb開始越來越大了
同事們都開始猜測我bb的性別
所有人都說我的是b女
因為我樣子沒有改變
都被說中了
而且
我發現已經個多月沒有長出腳毛了
可能是賀爾蒙改變了吧~
不過肚皮就長了很多肚毛啊
好肉酸呀~

秋天來了

最近早上開始清涼起來
秋天好像已經來臨了
日子一天一天過
看著爸爸一天比一天辛苦
我的肚子一天比一天大
爸爸
你能等到你的孫兒出來嗎?
好想跟爸爸拍些照片
好讓將來告訴我的孩子
你曾經在媽媽的肚子裡跟外公合照啊!
你看
外公的樣子多慈祥
即使日後你沒機會叫他一聲「外公」
他也會像天使一樣守護著我們!

初乳? (16w6d)

前兩晚發現乳房比平時有點硬
輕按之下
竟然有一兩點透明鹹鹹的液體自兩邊滲出
嘩~!!
好震撼啊~!
第一次目睹這種情況
好驚呀!!!!
是否初乳??還是我生野??
奇怪是按摩後兩邊竟然軟綿很多
加上這陣子口裡常覺得甜甜的
尤其是飯後更甚
很不舒服
會不會有妊娠糖尿?
無理由丫??
我看來還是很瘦...
結果今天見醫生告訴他以上各種情況
他說都是正常的妊娠反應
那些應該是懷孕時的分秘
是否初乳不能確定
但兩邊都有的話
就肯定不是生什麼腫瘤
每個人體質不同
反應也不一樣
可能我比其他人早點吧!
至於口甜也沒關係
只要不是苦也就沒問題
另外我經常覺得胃酸倒流
喉嚨成日被酸氣頂住也是正常的
日後肚子越大便會越頂
oh~my god!!
今天看了照聲波
bb的腿很長啊
比預產期長了5天
頭則比預產期細了4天
沒緊要
不是大頭bb
生產時不會那麼辛苦
而且將來個子高高的
太好了~
醫生說是bb女啊
這是第二個醫生這樣說
加上我媽媽也說我的肚子比較圓
我想應該都不會錯的了
bb啊~
你真的很活躍啊
知道爸爸媽媽來看你
你不停的腳踢踢
很可愛
今天醫生還指出你膀胱、胎盤、心臟的位置
想不到小小的你便長出這麼多器官來
媽媽今天開始要停食葉酸
改食materna了
希望你能吸受
健健康康!
---------------------------------------------------------
今天記錄如下:
媽媽體重: 110lbs
bb身長: 112.3mm
頭骨闊: 36mm
大腿骨長: 26.9mm
至於預產期變化也沒有多大
一兩天的改變不需理會
日後再check!!

飲奶(16W1D)

最近毒奶粉事件越揭越大獲
好擔心將來bb出世要飲貴奶
飲貴奶都唔緊要
最怕要同內地人搶貨爭個你死我活先有得俾bb食
唉~
從第一天知道有了bb
便買了一罐特大裝安滿媽媽奶粉
頂~!
居然是澳洲同一個集團出產的
雖然政府檢驗說本港奶粉沒受影響
不過還是不要再喝了
幸好到目前只是沖了半罐 (因為本人實在很討厭奶 粉味)
感該冇事掛-_-!
最近飲得最多的牌子是十字牌純鮮奶
我腸胃對牛奶較敏感
只有純鮮奶才能下肚
那些高鈣低脂脫脂全都會令我肚瀉
為了bb健康
那管純鮮奶會增肥高脂
也不理了
老闆向我推介了一隻澳洲入口的Pura pure milk
可是太貴了
還是飲十字牌頂住先~
遲d再問醫生是否需要食鈣片!

16W

不經不覺已來到16w
時間過得好快啊
肚子一日比一日大
大部分同事都已經知道了
原來公司真的是沒有秘密的
打從第一天向人事部遞信
不消三天
這消息已傳遍整個樓層
連有些八掛公也來打聽
男人之家
關你咩事呢?
現在身體上已沒有什麼不適
大慨我與bb已適應了彼此在一起
連胃氣、胃脹、作嘔也消失了
太好了
人家說最辛苦是頭三個月的孕期
我已經過了
而且過得很舒服
相比其他人
實在好得多
感謝!
目前還未感到有胎動
還太小吧!
bb
你知道嗎?
爸爸對我們很緊張啊~
上星期出外食飯
他連媽媽夾菜也很著緊
生怕肚子頂到飯桌會把你頂親
還有….不許媽媽彎腰執拾
還有還有….某次在地鐵車廂內為了媽媽的安全
竟然指罵一個以為自己李小鵬上身示範吊環單槓的細路仔
哈….你爸爸真的很疼你啊~!
像這樣斯文害羞的男人
竟然為了我們
第一次當街罵人!

健康院產檢(14W4D)

bb,
今天媽媽一早帶你到健康院產檢
最近你很乖啊
沒有什麼令媽媽不舒服
食得訓得
目前有49.8kg
又較兩星期前重了
做完基本檢查
姑娘給我聽bb你的心跳
卜通卜通很活躍啊
每分鐘大概有一百三十幾下
很正常啊
之後又看了驗血報告
全部都無問題
又合格
太好了
四星期後再覆診
bb
你真的很善解人意呢
知道你爸爸經常不在媽媽身邊
照顧她安慰她
你也就乖乖的等爸爸回來
你婆婆也很疼你啊
隔天便煲花膠湯給我們喝
把媽媽照顧得無微不至
將來你長大
一定要好好孝順婆婆啊~!

八月聚會

過去的八月是忙碌的聯誼月
分別與多個十萬年冇見的朋友圈聚會
----------------------------------------------------------------------
八月八日L&S結婚
老公不在香港
唯有單拖出席
好開心的一個晚上
看見了四年沒見的舊同事
彼此模樣依然
很warm的感覺
這餐喜宴就像我們從前annual dinner一樣熱鬧
自顧自拍照談天說笑耍白痴
不知道以後還有沒有機會齊集這麼多人再聚首呢?
------------------------------------------------------------------------
八月十六日老公的一班朋友來我家鐵板燒
在花園放上鐵板像韓燒一樣
好好玩
然後有wii有賭錢
可惜我很早便去睡了
沒有參與其中
------------------------------------------------------------------------
八月三十日中學同學十五週年聚會
頂
乜原來大家都咁老了
book了cafe可以舒舒服服傾下計食下野無人搔擾
真好
今晚有廿七人出席
嘩~~
好熱鬧啊!
-------------------------------------------------------------------------
這個月
打了兩次風
無端端多了兩日假在家
真好~!
踏入九月
希望一切平安．順利!

OSCAR(12W5D)

今天一早到威爾斯抽血和度頸皮
他媽的
比我上班還要早
約我8:45AM去到但佢地仲未有人開工
WTF, 已經好燥底
等了又等....等到十點先抽血
之後醫生未返工
又再等
等了又等....等到10:45AM先輪到我照
哈....我笑了~
bb好百厭
他扒在我的身上，背朝外
手腳都在兩旁
從屏幕的黑影看來很像一隻好大好大個頭的烏龜
我從來未看過我bb擺這種post
笑死了
醫生在我肚皮上不停搓
又篤佢
可惜我頑強的bb依然沒法動搖
醫生笑說他很百厭唔合作
無法做檢查
頂~
我要在外面行半個鐘等佢轉身才可以繼續
於是百無了賴遊離浪蕩的我唯有在外面邊行邊等
開始肚餓又想作嘔了
我摸著脹鼓鼓的肚皮跟bb說
你乖啦...你合作d啦....爸爸媽媽都好錫你架
再兇佢....你想食野就聽話啦....做完就有得食架啦....
係咪好肚餓呢....乖乖地做完帶你食d好野.....
.
.
然後再等了一個鐘
終於再輪到我了
這次bb從左邊走到右邊
姿勢已躺好
乖乖的側睡在一旁
good~~
這次check了很久很仔細
bb身長6.73cm
頸皮0.18cm
鼻骨0.17cm
心跳167/mins
手仔腳仔四個心室都很清晰
原來bb度身長只是計算頭至petpet的長度
不計腳長的
我的bb一路照一路伸直對腳係咁踢
好活躍啊!! (一見佢郁就好開心好興奮啊!)
而且對腳好長啊~~似媽媽就好了~!!
可惜他的鼻仔好似唔似....似足我無鼻樑扁tac tac
頂!!
點解唔似佢爸爸
佢爸爸個鼻又高又直似足外國人
點解偏偏要似我
好失望=_=
醫生話好大機會係bb女
第一胎是仔是女對我都無所謂啦
係我地既bb我地都鐘意架啦~
最後醫生給我帶走3張照片
我們離開半小時醫院便來電通知結果了
一切正常不用擔心
太好了~
----------------------------------------------------------------------
忘記了有沒有記下這個月的體重
2/8-->47kg
14/8-->48.5kg
29/8-->49.2kg
這三個月已經重了8 lbs
bb我們繼續努力吧!

讓座 (11W2D)

今天上班乘地鐵時有位眉精目企的師奶望住我個肚
呢位師奶一路睇都市日報一路啤住我個肚
肚腩?真係肚腩?
啤左兩個站
突然如夢初醒般讓座給我
嘩~~
即刻非常唔好意思羅
陀bb以來都係第一次有人讓座
其實都唔好係好明顯者
三個月都未夠
可能佢見我手幼腳幼冇身材奀挑鬼命但又肚突突喎
真係心存感激
每日返工都只係希望d人唔好左迫右迫來去怱怱我已經柯．呢．吉．蒂
暫時企十零個站都仲ok
估唔到身邊竟然出現位金晴光眼的大好人
可惜丫
我只係坐左一個站就下車了
anyway
第一次感受大肚婆的特權
竟然臉．紅．了!!

第一次瑪嘉烈產檢(10w4d)

昨天老公陪我到瑪嘉烈檢查
我告訴醫生私家檢查結果
較最初在醫院登記的記錄遲了兩星期
於是他又安排我照超聲波
真好
想不到可以又見到bb了
這次bb長4.48cm
姑娘說大概是4.5cm
差不多11w
好生猛呀, 手手腳腳同身體不停郁
較兩個星期前足足大了一倍
最終都證實了跟私家醫生的檢查吻合
也就安心了
隨後也安排了照結構超聲波及驗糖尿的日期
基本檢查也做了
我想
如果你能對那些木獨黑臉粗聲粗氣的咀臉麻木的話
去政府醫院生都沒大問題
還有還有
第一次被男醫生先用鴨咀鉗再用手指探內檢查
pk
好很痛喎
好有侵略性
頂
我唔喜歡咁喎
千萬不要弄傷我bb!!!
******************************************
最近的狀態很反覆
時好時差
有時半夜醒了又睡不著
精神差就自然成日想嘔
而且
開始唔想食飯
每日都只在晚餐時吃半碗
但成日都肚餓
一肚餓就想嘔
食少少又飽
體重也跟半個月前差不多
bb
你要吸收多d
你食多d野先會肥架
你吸多d我的營養
那你媽媽我就不會過重了!

第一次見bb (8w6d)

等左兩個幾星期
昨天老公一早陪我去中環看醫生
終於看到我們的bb了
很奇妙啊~
清清楚楚
有頭有腳有心臟閃下閃下
醫生仲俾我們聽bb的心跳聲
好厲害呀
跳得好快好大聲
那一刻真的感動都想哭
bb
你知道嗎?
兩星期前還未確定你能健康成長
媽媽真的很擔心
如今看見你很健康
爸爸媽媽都放下心頭大石了
只是短短兩星期
便大得很快
難怪有同事已看出媽媽的肚子了
昨天醫生說你有22.7mm
應該是8w6d了
排卵期計算足足遲了兩星期有多
難怪上次只是6w時看不出你來
預計bb你將會在3月頭出生
好開心啊~
--------------------------------------------------
今天中午第一次見啡
好擔心
希望bb你冇事
都怪媽媽唔好啦~~
要訓多d先
bb你要乖乖地呀
肥肥白白
第日出來好多人錫你架~!

蛇出沒注意

住鄉村最令人討厭便是經常有蛇蟲鼠蟻出沒
尤其是炎炎夏日
最近家裡便有蛇出沒了
嘩~
未見過咁恐怖
我諗我都係住唔長架啦
昨天我們駕車出外回來
在家門口看見一條又長又肥的大蛇走過
本能反應第一時間關車窗
點解較極塊玻都唔郁
頂!
原來根本冇開過窗-_-
老公吩咐我留在車內
他落車跟住條蛇走前看看
確定牠到底有沒有走進屋內
後來看見牠走入了另一間廢屋
便放心回家了
痴線架
有我條手臂咁粗
點可以放心架
越來越覺得住村屋好危險!!
------------------------------------------------
兩星期前
有一條黑色有毒小蛇走入後花園
最初被bobo發現 (bobo是我家的獵犬啊~)
然後被老公的弟弟看見
大叫有蛇呀~~
我被勒令留在房內不準出來
奶奶關了家中所有的門窗
老公三兄弟拿了燒烤叉鐵鏟鐵鉗出去捉蛇
真係嚇死人咩
難得他們在這裡長大
什麼都不怕
點知條蛇唔知走左去邊搵唔到
呢個時候梗係要拖bobo出來搜索啦
原來牠走了入洗衣機管槽內
結果捉蛇三兄弟把洗衣機抬出空曠地方
左叉右叉
搞左足足一個鐘先用叉叉住條蛇個頭拉出來
再用鐵鉗夾實佢
再來鐵鏟切斷佢個頭
嘩~
點解我會知得咁清楚
皆因我見佢地搞左成個鐘都冇動靜
就出廳看看
點知係個玻璃窗度看到到活生生血淋淋個一幕
pk啦
好恐怖
本來唔想睇
但又犯賤諗住未見過睇一睇唔怕既
哎呀
點知咁恐怖既!

肚痛

舒服左幾日
今天返工又黎了
又想嘔了
又胃頂頂了
真係頂你丫~
昨天左下腹赤赤痛
持續了一天
間唔中痛下又唔痛下
但見沒有其他不適
就沒有去看醫生
我想大慨是水囊大到接近左邊了
子宮擴張的反應而已
還好今天睡醒已沒有再痛了
唔知bb點呢?
我想bb你應該好大食
媽媽每隔兩小時就會覺得肚餓
一唔食野就會嘔
星期六日想睡晏一點
點知準時7點半就要起身食野
唔食又想嘔
晚上每隔兩三小時又要上洗手間
從未試過一覺睡至天明
還好
我寧願大食d
都唔好嘔到食唔到野
食唔到野bb會唔健康的
肥就肥我吧!!

木棉

那是一棵高傲的木棉
夏天青蔥翠綠
冬天嬌艷絕麗
每次經過我都想停下來拍她
可是不是沒帶相機
便是坐在車上經過
這兩張照片是絕無僅有的
可惜都不是在她最漂亮的時候拍下的
最初和老公拍拖時
我們還是窮學生
還未有能力買私家車
他會騎單車送我出入村
每次經過這棵樹下
都會令我想起「戀之風景」裡的一幅畫面
好不浪漫
可是
這棵木棉最近被人砍了
陳屍路邊
好可惜啊
百年樹木
一下子消失了
我搬進這裡一年半
眼看不少人為賣地、建屋、擴闊道路....
大量砍伐樹木
甚至價值連城的樟樹也不放過
錢是賺不盡的
但天然資源是有限的
點解唔好好愛護我們的環境?
最深刻是有一年冬天的夜晚
當時男朋友駕車送我離開
在村口停車時突然飄來漫天紙碎
我呆一呆
以為點解咁多垃圾?塵埃?厠紙?亂飛
然後看真一點
啊~~
是木棉花的棉絮啊
比任何一場雪都下得漂亮
可是
此情此景可一不可再
這麼多年都只見過一次
以前
我都不會留意身邊的花草樹木
但現在住鄉村
才發覺她們都是最天然最珍貴的寶物
棵棵都成百歲
絕對不是那些為綠化屋苑而強行栽種盆栽
唉~
點解我們唔做番d野去保護佢地呢?

增磅

星期日胃痛
唔知點解
一餓少少就會好痛
最近發現每當想嘔的時候
吃少少東西進肚便舒服得多
而且
現在每隔兩小時便會感到肚餓
吃少少又飽了
中午晚飯時只吃得下半碗飯
吃不了多少又很脹飽的感覺
為什麼?
最近體重居然達108 lbs
痴線架
對我來說簡直是天文數字
有史以來都未試過咁重
足足重了6磅
但看上去又唔覺得重左咁多
雖然咪咪大了少少
但不至於每邊多了3磅咁筍掛
肚又唔係好大
雖然穿開的褲已著不下
但看在別人眼中
也未察覺我懷孕丫
至少乘車時還未有人會讓座俾我
最近有太多胃氣
氣頂頂
上星期五一早起來嘔黃膽水
黃黃的苦苦的
是有生以來第一次嚐這種味
嘔完當日舒服了很多
到底我們的bb現在怎樣
你出現了嗎?
好心急呀!

未見bb

昨天老公生日
他回來陪我去照超聲波
根據之前估計
bb應該有8weeks 5days了
原本約了6:15pm見醫生
點知等到7:45pm先有得睇
最初在肚照只看到胎囊
看不清楚有沒有胎芽
結果要飲大量的水
等了又等
等到尿急先可以再照
點知依照係沒有胎芽
最後索性用陰照
結果都係一樣
醫生建議2星期再回來看看
他說有2個可能性
一是排卵遲，所有野都推遲了兩個星期 (實際可能只有6weeks)
二是位置不理想，長不出胎芽
一切都要等2星期再看看是什麼事
好唔開心
一場歡喜一場空
到底bb在哪裡
會不會是空囊?
好擔心啊!
成晚訓唔著
有萬多個可能性
但無法估計
回家上網找找資料
有人需要做人工流產去掉空的胎囊
有人轉過第二個醫生就看到
有人要等到第10weeks先看到
到底點架?
好忐忑啊~
千其唔好有事呀!
兩個星期真係好難等
搞完晒d野足足等左2個鐘
仲衰過睇政府
又多大陸婆
一家五口黎晒一齊等
霸住晒d凳睇完又唔肯走
好q煩!!

好辛苦

這幾天很辛苦
孕吐的感覺很嚴重
可是卻沒有一次成功的嘔出來
永遠都只是嘔空氣
胃口也不好
沒有吃蛋沒有喝牛奶
現在看到或聞到烚蛋的味道都想嘔
臉上的暗瘡越來越多
皮膚也越來越差
加上早幾日冷著了
流鼻水鼻塞塞
公司裡的冷氣令人吃不消
披上薄薄的毛毯穿上冷外套才勉強頂得住
最近發現一肚餓便作嘔得很厲害
但其實自己又覺得無胃口唔想食野
d話梅陳皮已經食到我口臭
bb
你真係好大食喎
昨天放工都作嘔作悶好想食野
然後買了個麵飽食埋先可以落去搭地鐵
唔食我驚頂唔到返去屋企
我又驚真係在地鐵嘔了出來
所以而家隨身帶住個嘔吐袋
唉~~
一晚要起身3次去厠所
明明好口乾但飲多d水又黎想嘔
玩我咩?
明天去照聲波了
但昨晚發夢夢見bb沒有心跳
札醒了
嚇死我!
老公
跎bb真係好辛苦啊~!

作嘔了

今天是7weeks 6days
這兩天終於有想吐的感覺
真的很辛苦
像胃氣脹般頂住頂住
然後不停嘔空氣
尤其是刷牙後及起床後
今日在公司一張開口便想吐
但卻又什麼都吐不出來
我還有七個月要捱
媽媽，真的不容易當啊~!
最近返工放工時間都比以往用多了
走路要慢慢行
加上這幾天不停下雨
更加步步為營
希望快點平安渡過頭三個月
那時bb應該較穩定
昨天跟老闆說了
他是一個很好很好的老闆
給我很多意見
還借他家裡有關懷孕的書給我
跟他說了
反而有如釋負重的感覺
以後要請假或不適都可以直接講出來
太好了
bb,
前晚你爸爸告訴我
在乘飛機時替你想了個女孩名字
如果是男的
就留待媽媽替你改
哈哈~
這個爸爸看來很偏心啊~!

原來很緊張

BB,
自從知道有了你
爸爸媽媽都睡得不好
尤其是你爸爸
已經連續幾晚輾轉反側了
昨晚他告訴媽媽
其實他很緊張我們的
他比我更加擔心
他除了擔心妳
更加擔心媽媽的身體
擔心未來數月不在身邊
媽媽會有產前抑鬱
而且媽媽是那種事無大小都大驚小怪的人
希望媽媽不會嚇親bb妳
這幾天爸爸陪媽媽出街
他一眼關七的保護能力真的很厲害啊
他會用身體擋著追逐的小孩
每遇梯級、水tum、樓上冷氣滴水都會作出提示
時時刻刻都保護著我們
每天開兩次奶給我們飲
幫媽媽處理一向負責的家務
其實他真的好的無話可說
bb
你一定要生生性性呀
我們都愛你
老公
我真的好愛你!

腰痛+耳鳴

昨天腰背赤赤痛，痛一陣又唔痛
是否睡姿不正確呢?
可能是子宮擴張壓迫腰骨的後遺症吧!
希望不是任何不祥 先兆啦~~
還有，昨天在網上看到原來某些孕婦會出現耳鳴
真的!!!
我記起在6月30日當天(那時還未驗 孕，應該有6weeks 3days了)
無端端出現耳鳴
持續了整個下午
當時只感到奇怪
除 了乘飛機外
我從來未試過出現這種情況
還以為是有東西進入了耳朵內
現在回想起來
可能就是 初孕的母體壓力改變而出現的情況

+++++++++++++++++++++++++++++++++++++

這幾天每 日的早餐都是牛奶+烚蛋
有點膩了
明天試下食麥皮先
奶+蛋+麥皮天生都是我的死敵
從來都 不會放入口中
一聞到都唔想食
現在為了bb的營養著想
頂硬上啦~~

清補涼原來不是涼的

今天午飯後奶奶煲了清補涼給我喝
我第一個反應:「下?唔係涼既咩?」
奶奶話:「係清同補架!!我專登煲俾你飲架...」
我 心諗:「會唔會你搞錯左呢...」
我扮晒野咁想佢confirm多一次:「我一直都以為是涼的啊~~~」
奶奶:「清補涼 入面係有d涼既湯料，唔落個d就冇事的，而且，我仲加了xxx、xxx、xxx......」(我唔記得佢話加左d咩，只係關心飲左對bb有冇問題)
一 番心機當然不能在她面前糟蹋
結果咪一飲而盡羅~~
飲完即刻衡入房上網找資料
看看清補涼是否真的適合孕婦 飲用
果然如奶奶所說可以降胎火又唔怕涼
當堂安落晒!! (我真的好很賤，人家對你咁好仲亂諗野)

出街驚魂

昨天在旺角逛了一會
買了結婚禮物給L&S
晚上大夥兒吃飯
老公只是向shirley透露我不能吃 生冷野
然後無啦啦又補充一句:「醫生話佢腸胃唔好呀!」
好似此地無銀咁
唏~
bb，你爸 爸都係唔識講大話架啦
shirley只係笑笑口咁望一望我
我feel到佢好似知道d乜咁
好彩佢都識做， 冇問我野
等多幾個月啦
等bb唔小器時我就可以同大家講啦
在旺角行街真是有點窒息的感覺
人 流迫空氣焗
行行下有點暈要抖抖
我話過
bb出世前我唔會再到旺角了
好辛苦呀!
飯後去了他們新居港灣豪庭
個的士司機差d嚇死你呀
橫衝直撞，在燈位差d撞埋另一架的士度
嚇死我了
上 到新屋, 心諗:「乃屎了...」
新屋充滿著裝修完的味道
頂!!!早知唔去啦
我即刻想起表姐的不快經歷
千萬不要發生在我身上啊!
幸好屋內沒有天拿水氣味
幸好我們逗留了半個鐘老公便說走了
離開之後一直都覺得很不安
仿佛鼻腔裡還有這種氣味
bb，你千萬不要出事啊!!
否則，媽媽會很內疚的!!
唉~
我想，未來幾個月都不會出街約人了!!

7-weeks

今日踏入懷孕第七個星期
至今仍沒有任何作嘔作悶流啡的反應
只是早幾日有胃氣脹，頂住頂住
同埋個肚間中陰d陰d咁痛
會不會有問題呢?
昨晚開始飲安滿孕婦奶粉
ok啦
淡淡的不重口味
適合我呢d唔飲奶既人
我本身對奶粉味極之反胃
不過為了bb好都要飲
另外
昨晚網上登記了威爾斯OSCAR檢查
今天一早便有姑娘回覆
約好了8月15日做檢查
那時應該有13weeks
費用是$1300
幾貴都冇所謂了
bb的健康是最重要的

西九龍母嬰健康院

今天很早出門
預約了9:15am做檢查
雖然我們早到了十五分鐘
但已經看到很多人了
原來健康院也是先到先檢查的
先度高、磅重、驗尿糖、尿蛋白、血壓、心跳
聽講座(冇去聽)
登記病歷、見醫生
那個女醫生先用鴨咀鉗，再用手指檢查我
嘩~~~
好驚呀
咁大個女都未試過咁尷尬
鐵鉗喎、手指喎
好核突的感覺
會唔會整親bb架??
然後抽了四筒血
轉介了下次到瑪嘉烈檢查
雖然網上的討論區都話瑪嘉烈好差
但瑪嘉烈近媽媽呀
我又唔知邊到好唔好
乜都唔識
最緊要方便快捷
生仔既野
邊度都係咁生架啦
而且peggy係個度做
等我遲d問下佢先
另外
又book了兩個星期後去看私家醫生照超聲波
那時應該有8星期了
可看看胎位有沒有問題
再看看這個婦科醫生
有沒有在哪一間醫院掛牌
我們決定另外也book一間私家醫院
到時才決定在那裡生
------------------------------------------------
今天姑娘說bb該有6星期6 日
預產期是2月20日
anyway
邊日都好
暫時都不要告訴別人
怕小器喎~~
bb
你要乖乖地呀!

確定了

幸好這個星期老公和我都放大假
我們擱置了旅行計劃
今天一早便去看家庭醫生
經過尿液測試及經期計算
醫生便告訴我已懷孕六星期
預產期為2009年2月22日
醫生給我開了一星期的葉酸
並寫了醫生證明
著我到公立或私立醫院登記
醫生也再一次confirm了上兩次吃的藥沒有問題
不會有任何影響
好開心啊!
是真的了
出去跟老公說了
他聽到後就是不停地笑
然後我們立即回家告訴媽媽
也買了一罐安滿孕婦奶粉
也告訴了奶奶
大家都很高興很驚訝啊~
然後
老公不停上網找資料
趁著這幾天大假
辦好登記的事
打電話去健康院預約了
明天便可以去檢查
一切都來得很快

中了

倒屎咁早起身用晨尿驗孕
就是我七．一慶回歸當日的頭炮活動
因為忐忑不安又睡不著
六點幾旗都未升趁著大家未起身便走入廁所驗
不消一兩分鐘
一條淡淡的線便出現了(那是在萬寧買的活色生香牌特價貨)
直覺告訴我
這是真的
難怪最近常常發許多有關生bb及懷孕的夢
難怪最近很燥底
難怪M小姐半個月沒來找我了
立即去推醒老公
他半信半疑的反應令我覺得他不是太高興的
頂
點算好?
要點做?
今天是假期
唯有明天去看家庭醫生

戀愛ing

原來戀愛真的會令人發姣
M小姐與B先生在我們的撮合下終於成為一對
從此脫離dry左好多年的單身生活
真是可喜可賀
這對令人眼怨的痴情男女
從台灣帶來了令人眼怨的手信
1)一盒姣pink的士多啤梨朱古力
2)一個彷彿把自己投射到little twins star身上如神仙眷侶般翱翔天際的擺設
噢!
太誇張了吧~
以前M小姐去旅行的手信大多是中庸實用派
但今次好明顯是浪漫化了
而且人也明艷照人容光煥發滲出淡淡的女人味
不再是我認識man過man的M小姐了
真的衷心替你找到幸福而高興
也因為幫到兩顆失落的心找到倚靠而自豪
認識你差不多十年了
看著你愛過、踫過、跌過
嘗過了酸甜苦辣
最終找到了失散在地球上的另一半
我比你更開心呢~
因此這篇日誌是為你倆而寫的
要好好握緊得來不易的幸福啊!

爸爸，生日快樂!

星期一替爸爸慶祝生日
這可能是最後一次，或兩次...不知道
也不想去計算
自從他發現患癌以來
日子是以日計算
畢竟他年紀已大
任何治療都起不了作用
得一日、賺一日
自自然然快快樂樂去度餘生反而更好
今晚我們在酒樓訂了一圍菜
老爺奶奶也來
大顆兒樂了一個晚上
爸爸、我愛你!
你要堅持下去
要看著你的孫兒出生、成長
至少聽到他懂得喚你「公公」
這是我也是你最大的心願!

為食狗

住係農村一定要養返幾隻狗睇門口
其中呢隻金毛尋回犬重80磅
可惜佢只係對食物非常敏感
就算睡著了
只要聽到廚房有膠袋聲便會一支箭衝入黎
好搞笑啊~!

放大假

終於展開一連九日的假期
給自己好好調整一向偏高的皮質醇
最近發覺自己很燥底
生理跟心理都有點不平衡
咩事呢?
這星期加班加到暈
遇上了kai到爆的人
使我們的工作百上加斤
點解公司會請d咁既人?
點解呢種人仲未炒得?
咩事呢?
那天在地鐵被一個婆娘撞到發脾氣
然後師奶鬥師奶的在車廂內爭吵起來
一向走溫婉嫻熟資深少女路線的我
竟然大庭廣眾下跟一個師奶鬧交
咩事呢?
M小姐遲了兩星期還未來找我
一向想生BB的我
竟然淆底了
早前才病倒吃了十多天咳藥水傷風丸退燒丸氣管 藥抗生素....
唔係咁都撞到下話
咩事呢?
前日去了另一層樓執野
有位男同事走過黎搭訕
「你新黎架?」、「我叫XXX，你叫咩名呀?」、「你坐呢度呀?好丫...」
我心諗: 「 唔係下化?」、「我舊過你啦小didi」、「我坐樓上架喎~」
然後有另一同事笑這男生:「中． 伏．了」

工 作了幾年還未被人認識
由此 證明我真的很摺
咩事呢?

如果我們生活像狗狗一樣
無憂無慮無牽無掛
每天只懂吃痾睡
還有人帶妳去街幫你捉虱仲要用vidal sassoon同你沖涼
你說多好呢?

好!!
就讓我這個假期
無憂無慮無牽無掛
每天只懂吃痾睡
還有人帶我去街幫我捉虱仲要用vidal sassoon同我沖涼
good~~