吾家妹妹出生記

之前有想過妹妹不如你5月5日出來
易記
又可以把妳乳名叫做「孖五」
幾型，係咪先?
當日上午老爺駕車載著我到醫院走一趟作實地演習
看看到醫院的路怎麼走、需時多少

(我家人真的很認真....但我覺得多舊魚羅!)
然後順道去作一次產檢
醫生說頭很低了
我夠知低啦
低到墜下來好似兩旁的肉接不住
即係呢
想像下好似用兩隻手指挽住袋八公斤的米
就跌就跌手指就黎無力斷開咁羅

醫生問我執好走佬袋未
懂不懂產房的入口在哪
便打發我走
我見毫無動靜
索性去吃碗大涼粉+腐竹蛋糖水
看看有沒有幫助
其實看醫生前已經吃了壽司刺身
怕一旦生左有排唔食得
當晚同事還在面書仲問我生得未?悶唔悶?
點解咁關心我生得未呢?
因為大家都下了賭注羅!!!

就在當晚睡覺前攤在床上玩手機裡的上海麻雀之際
(對!!我極度喜歡這些低能益智遊戲)
個肚那那痛
像扭毛巾一樣那到實一實
痛一陣又唔痛
我以為拉屎啦但又無便意
幾分鐘後又痛
頂!!一路玩一路痛又突然唔痛反反覆覆幾多次
最後痛到玩不到下去
(無錯，我是個有始有終的人，舖牌都未完，係咪?)
於是告訴老公我肚痛
頂你一邊看著電腦屏一邊敷衍我，係呀!痛呀!
然後我真的火起說了句:「頂你，我真係肚痛呀!」
他第一次聽到我用「頂你」去罵佢自己
才知事態嚴重
後知後覺的立即關掉電腦然後問我點做
拿..同我計時啦...看看隔多久痛一次
誰知一來已經是2-3分鐘痛一次了
豈不是就快生得
家陣開車去醫院要半個鐘喎
但仲未見紅
去到如果流料又要打道回府
零晨時份個個都好眼訓
老公明天又要上班
連我自己都好想睡但實在痛到睡不著
上胎都無這樣痛的
後來叫老公先去睡
自己繼續在房裡騰來騰去
兩個小時候終於看到第一滴血
立即推醒老公
老爺駕車送我們去醫院
當時已經是5月6日的凌晨時份
出門前還冷靜的拿了大毛巾墊在車子椅上
怕破了羊水好難清潔
車子路上黑漆漆的飛馳

半個鐘後終於到達醫院
去到產房姑娘知道是第二胎而且3分鐘痛一次便很緊張
立即換衫探熱量血壓內檢
宮頸仍未開但探完手指流了很多血
凌晨兩時多
姑娘著老公先回家或在產房門外等
我持續的流了很多血漿(不是水, 是很黏的漿,好得人驚!!!上次都不是這樣的)
一直等到六時半天都發白
宮頸仍未開
陣痛已變成5-6分鐘一下
由於產房很爆孕婦、助產仕不停出出入入
聽到隔離左右的女人鬼殺咁嘈
一陣又生唔到推過對面開刀
一陣又bb臍帶纏頸要急救
一陣又就死啦生唔到啦痛死啦呀呀呀
好心寒!!!
姑娘見我仲未生得決定把我推回產前房
出來時看到老公及媽媽在冷清清的走廊等著
媽媽還為我準備了熱湯及薑飯
好感動!!
可是未生得又唔食得
未到探病時間又唔可以陪我
我叫他們先回家休息
在家等好過在醫院等


5月6日就是一整日都在產前房乾等
痛下又唔痛下
大概5分鐘痛一次
每次30秒
血仍持續的流
肚痾了3次
還在產前房對面床踫上了工作上的客戶
想不到我們真的有緣
上次見面我們都未大肚
看樣子很年輕
原來她也是第二胎
已有一個歲半男孩的她今次生女而後來我們巧合地同一天生產
可是見她痛到典床典席我都沒心機去撩佢傾計了
至於我就痛下唔痛下都忍得到(本人認痛能力是超強，吃得苦架!!)
期間很多同事打來生左未呀未得呀阿邊個叫緊糊你忍多2日啦 (頂你我d同事真係好好羅)
後來晚上有段時間直頭唔痛添
從一開始在家陣痛到廿六個鐘後終於真的黎了

當時是5月7日凌晨
突然聽到像玻璃撕裂的卜一聲很多水湧出來
然後我告訴阿嬸我好像穿水
誰知我聽到她轉述姑娘說我流水不知是否瀨尿
再等一會還未有人來看我
隔離床的香港媽媽很好人自己忍著痛下床去找姑娘來看我
好好好好感動!!!
公立醫院人手不足是真的
而且真的很嚴重
我進來一日一夜期間也沒有姑娘有空幫我檢查過
看她們忙到不可開交我也不好意思諸多要求
終於有姑娘來幫我內檢
咦~~未穿水喎，不過已經開了3-4度
可以推落產房等
於是立即打電話給老公出來陪我
好心急快d啦我已經等到好悶啦今次仲唔輪到我
落到產房檢查未穿水喎不過已開了5度
姑娘核對文件準備止痛氣然後離開叫我覺得急屎就按鐘
但她們都未離開間房工具都未執齊我已經好急了
再檢查...嘩8度了，等等忍下先等姑娘執埋d工具先唔好痾住你老公未黎喎仲等唔等
唔等啦唔等啦我忍唔到啦
你聞氣啦止痛架(後來生完連針時才發現之前我一直錯按根本沒有吸到氣)
止唔到喎要痾啦喎
好啦用力啦
唔得呀生唔到呀
你生過架你識架啦(仆街我呢個時候仲點會記得手拉腳撐呀, 你地又唔講, 剩係識話用力用力)
唔得呀無力呀
唔好用力住bb臍帶纏頸呀
咁點呀
忍一忍好似吹蠟燭咁呼氣
個幾分鐘忍一忍簡直像過了一個世紀
心裡又好擔心纏頸呀點算好
終於bb被拉出來聽到喊聲
舒服晒!
但我對腳抽筋下肢狂震(姑娘說我用錯力/用力過度所以震)
震了數分鐘才慢慢有知覺
我還以為失血過多添
由於沒有剪會陰爆了少少補左幾針
大小平安
bb無事我最開心
從產前房推下來生產完成整個過程只是7分鐘
快到難以相信
老公趕到來後bb已經推了出門口
他在外面看了bb跟bb拍照才進來看我(你睇你睇,我地位極卑微)
看到老公來很想哭啊!!
生仔原來真的好痛
上次老公陪我生婷婷時明明很舒服
如果上次像今次一樣咁辛苦咁痛
都唔會生第二胎
夠啦夠皮啦唔好搞我啦, 追仔?唔駛諗啦。